*📦தேர்தல் பணிக்கு ஆசிரியரைத்தான் அனுப்ப வேண்டுமா❓*

🌟⟦T⟧ ⟦N⟧ ⟦P⟧ ⟦T⟧ ⟦F⟧🌟
  ⚡⟬ அ ⟭ ⟬ ய ⟭ ⟬ ன் ⟭⚡

https://tnptfayan.blogspot.com/2019/11/blog-post_13.html

*🎙பள்ளிக் கல்வியில் உள்ள பல்வேறு சிக்கல்களில் , கற்றல் கற்பித்தல் குறித்தான நீண்ட விவாதம் நடந்து கொண்டிருக்கின்றது.*

*🎙குழந்தைகளிடம் ஆசிரியருக்கான நேரக் குறைவு ஏன் என்ற பல காரணங்களை  ஏற்கனவே நாம் ஆராய்ந்து வருகிறோம். இந்தப் பட்டியலில் அடுத்து நாம் சேர்த்துக் கொள்ள வேண்டியது கீழே உள்ள அறிவிப்பை ஒட்டி, வருடம் முழுவதும்வாக்குச் சாவடி அலுவலராகப்  (BLO-Booth level officer )  பணியாற்ற ஆசிரியர்களை ஈடுபடுத்துவது.* 

*🎙வாக்காளர் பட்டியலில் பெயர் சேர்ப்பு மற்றும் திருத்தம் மேற்கொள்வதற்கான கால அவகாசம் நவம்பர் 18ம் தேதி வரை நீட்டிப்பு  மாநில தேர்தல் ஆணையம் - இது தான் அந்த அறிவிப்பு.*

*🎙எந்த பள்ளியில் எல்லாம் தேர்தல் நடக்கும் வாக்குச் சாவடி (Election Booth) அமைப்பார்களோ அந்தப் பள்ளியின் தலைமை ஆசிரியர் கண்டிப்பாக அந்தப் பள்ளியில் அமைக்கப்படும் வாக்காளர் சரி பார்ப்பு முகாம் (Camp) அதிகாரியாக இருப்பார். அவர் சனி , ஞாயிறு நாட்களில் கட்டாயம் பள்ளிக்கு வர வேண்டும். பள்ளியில் காலை 10 மணி முதல் மாலை 5 (அ) 6  மணி வரை இருக்க வேண்டும். முகாம் 4 முதல் 8 வாரங்களோ சூழ்நிலையைப் பொறுத்து இன்னும் சில வாரங்களோ நீட்டிப்பு செய்யப்படும்.*

*🎙தேர்தல் நடக்கும் போது அனைத்து ஆசிரியர்களுக்குமே தேர்தல் பணி (Election Duty) வரும். அதில்  மாவட்ட ஆட்சியரின் அறிவுறுத்தலுக்கு இணங்க ஆசிரியர்கள் ஜனநாயக அரசின் தங்கள் கடமையாக, தங்களை ஈடுபடுத்திக் கொள்வர். 99% ஆசிரியர்கள் இப்பணியைத் தவிர்க்க மாட்டார்கள்.*

*ஆனால் இந்த வாக்குச் சாவடி அலுவலராகப்  (BLO-Booth level officer )  பணியாற்றிட ஏன் ஆசிரியர்கள் கட்டாயப்படுத்தப் படுகின்றனர் ?*

*உண்மையில் யார் செய்ய வேண்டிய பணி ?*

*மாணவர் கல்வித் தரம் குறைய இது ஒரு காரணமாக அமைகின்றதை ஏன் கல்வித் துறை அதிகாரிகளோ மாவட்ட ஆட்சியரோ கூட கவனத்தில் கொள்வதில்லை ?*

*இது குறித்து ஆசிரியர்களின் நிலைப்பாடு என்ன ?*

*🎙ஆசிரியர்களுக்கு அந்த பகுதி வாழ்மக்களைத் தெரிந்திருக்க அதிக வாய்ப்பு இருக்கிறது என்பதற்காகவா அல்லது ஆசிரியர்கள் தான் பொறுப்பாக செய்வார்கள் என்ற நம்பிக்கையாலா அல்லது ஆசிரியர்கள் யாரையும் எதுவும் எதிர்த்து கேட்பதில்லை என்பதாலா, என்ன காரணமோ... ஆனால்  தமிழகம் முழுவதும் பரவலாக பெரும்பான்மையான மாவட்டங்களில் அரசு பள்ளி  ஆசிரியர்களுக்கு தான்  வாக்குச் சாவடி அலுவலர் பணி தரப்படுகிறது. இன்று நேற்றல்ல , பல வருடங்களாகவே ஆசிரியர்கள் தான் இந்தப்  (BLO ) பணியை செய்து வருகிறோம் என்கின்றனர் வருத்தத்துடன்.*

*🎙முடியாது என்று மறுத்தால் வட்டாரக் கல்விஅலுவலர்  முதல் முதன்மைக் கல்விஅலுவலர் வரை மிரட்டலுடன் கூடிய கட்டளை  வேறு. ஆகையால் ஆசிரியர்கள் பயத்தினால் அந்தப் பணியைப் பார்த்துக்கொண்டு இருக்கின்றார்கள் என்கின்றனர் பலரும்.*

*🎙2014 - 2015 இல் ஆதார் எண்ணை சரிபார்த்து விவரம் அனுப்பக்கோரி , பயிற்சி  எதுவும் இல்லாமல் வாக்காளர்கள் பட்டியல் புத்தகத்தை கொடுத்து அனுப்பி விட்டார்கள்.. வாணியம்பாடி தாலுகாவுக்கு உட்பட்ட இரண்டு கிராமம் முழுவதும் பள்ளிநேரத்திற்கு பிறகும் சனி, ஞாயிறுகளிலும் பணி செய்து முடிச்சாச்சா முடிச்சாச்சா  என்று விரட்டி விரட்டி வேலை  வாங்கினார்கள்.. முடியாது என்றாலும் விடுவதில்லை. அந்த கணக்கெடுப்புக்கு உரிய தொகை தருவதாகக் கூறியதை அடுத்து, வட்டாட்சியர் அலுவலகத்திற்கு சென்றால் உங்கள் பெயரே பட்டியலில் இல்லை என்று சொல்லிவிட்டார்கள். வட்டாட்சியரின் தொலைபேசி மற்றும் வட்டார ஆய்வாளர் தொலைபேசி உத்தரவின் பேரில் செய்த பணி என்று வருந்துகிறார் ஒரு ஆசிரியர். கணக்கெடுத்து முடித்தவுடன்  புத்தகத்தையும் கொடுத்தாயிற்று, திடீரென 2 வருடங்களுக்குப் பின் ஒரு நாள் அழைத்து அது தொலைந்து போயிற்று , மீண்டும் ஆதார் எண்ணை சரி பாருங்கள் என்று கூறுகின்றனர், நாங்கள் எவ்வாறு 2 வருடங்கள் கழித்து இப்பணியை மீண்டும் செய்வது, நேர விரயம் அல்லவா என்று ஒரு ஆசிரியர் கேட்கும் கேள்வி நம்மை சிந்திக்க வைக்கிறது.* 

*🎙ஒரு தொடக்கப்பள்ளியில் 5 ஆசிரியர்கள் பணியாற்றுகிறார்கள் என்றால் அனைவருமே வாக்குச் சாவடி அலுவலராகப் பணியாற்ற வேண்டும். மேலும் மீட்டிங் என்றால் அனைவரும் தவறாது கலந்து கொள்ள வேண்டும் இல்லையெனில் மாவட்ட ஆட்சியரால் மேல் நடவடிக்கை எடுக்கப்படும் என்பது போன்றதான எச்சரிக்கைகள் தரப்படுகின்றன. மேலும்  மதியம் பள்ளி நேரத்தில் மீட்டிங் என அழைத்தால் பள்ளிக் குழந்தைகள் நிலை என்னாவது ? இதைக் கேட்க யாருமில்லாத அவல நிலை என்றும் ஆசிரியர்கள் வருந்துகின்றனர்.*

*🎙இது போன்ற வேலைகளின் நடு நடுவே தான் அவ்வப்போது கிடைக்கின்ற நேரத்தில் கற்றல் கற்பித்தல்  செயல்பாடும் நடைபெறுகிறது என்பது வேதனை.*

*🎙எங்கள் பள்ளியில் இரண்டு ஆசிரியர்கள் வாக்குச்சாவடி அலுவலர்களாக பணியாற்றுகிறார்கள்..... இரண்டு ஆசிரியர்கள் Nishtha training..... பள்ளி நாட்களில் மாணவர்களை பத்திரமாக பார்த்துக் கொள்வதே சிரமமாக உள்ளது....,. வாக்குச்சாவடி அலுவலர்களாக உள்ள ஆசிரியர்களை அந்த பணி முடித்து தர  வருவாய்த்துறை அதிகாரிகள் நெருக்குகிறார்கள்.... கற்பித்தல் தொய்வடைகிறது எனது குழந்தைகள் முற்றிலும் முதல் தலைமுறை குழந்தைகள். சென்ற ரத்து செய்யப்பட்ட உள்ளாட்சி தேர்தலில் போட்டியிடுபவர்களின் மனுக்களை பெறுவது பரிசீலிப்பது என புதிய பணியை என்னுடன் பணியாற்றும் ஆசிரியருக்கு வழங்கி ஒரு மாதம் ஓராசிரியராக பள்ளியை இயங்க வைத்தார்கள்.  இந்த முறை மறுபடியும் இத்தகைய உத்தரவு வந்தால் எங்கள் குரலற்ற  குழுந்தைகளை யார்  காப்பாற்றுவார்கள் என்று ஒரு ஆசிரியர் வருந்துகிறார். வேலை நேரத்தில்  வாக்காளர்கள்  வீட்டில் இருப்பதில்லை. எனவே பள்ளி முடிந்த பின்பு  (Door by door) ஒவ்வொரு வீடாகப் போக வேண்டும். ஒரு நாளைக்கு பத்து வீடுகள்  தான் விசாரிக்க முடியும். அதற்குள் இருள் வந்து விடும். பெண் ஆசிரியர்கள் எவ்வாறு  வீடு போய் சேர்வது என்ற புலம்பல்களும் உள்ளன.*

*🎙ஆசிரியர்களின் பணி மாணவர்களை சிறந்த குடிமக்களாக வளர்ப்பதும் அறிவில் சிறந்தவர்களாக, ஆராய்ச்சி சிந்தனை உள்ளவர்களாக தங்கள் கற்பித்தல் திறனால்  உருவாக்கும்  பணி. ஆனால் அதற்கு நேர்மாறாக செய்யக் கூடிய பல பணிகளுடன் இந்த  வாக்காளர் விழிப்புணர்வு , வாக்குச் சாவடி அலுவலர் பணி என எங்களை கசக்கிப் பிழிவதில் என்ன சமுதாய மாற்றத்தை மாணவரிடம் உருவாக்க முடியும் என்கின்றனர்.*

*🎙தற்போது , செயலியில்    செய்யும் ஆதார் எண் பதிவேற்றப் பணியின் போது  விரைந்து செய்யவில்லை என்று மெமோ கொடுத்து விட்டனர் என்று ஆத்தூர் ஆசிரியர் ஒருவர் கூறும் போது அந்த செயலி (app)யில் சர்வர் திறக்கவே இல்லை (server not open) இது போன்ற தொழில்நுட்ப வசதிகளே இல்லாத சூழலில் நாங்கள் என்ன செய்ய இயலும் ? என்று வருந்துகிறார்.*

*🎙கிருஷ்ணகிரி மாவட்ட ஈராசிரியர் பள்ளியின் பெண் ஆசிரியர் ஒருவர் கூறும் போது , "நானும் பத்து நாட்களுக்கு முன்பு இப்பணியினை தினமும் நள்ளிரவு 11 மணி முதல் அதிகாலை 2 மணி வரை செய்தேன். தினமும் இப்படி தொடர்ந்து ஒரு வாரம் செய்ததில் உடல் நிலை மோசமாகி விட்டது.*

*🎙BLO பணியை ஆன்ட்ராய்டு அலைபேசியில் தான் செய்ய வேண்டும், அப்படிச் செய்வது மிகவும் சிரமமான பணி. இப்போது சரி செய்யும் பணியை மிகுந்த மன உளைச்சலில் செய்தேன் அதுவும் இரவு 10 மணிக்கு மேல் தான் செய்ய முடியும். போனில் செய்யும் போது தூக்கமில்லை, தலைவலி தினமும் மாத்திரை எடுத்துக்கொண்டு தான் அந்த பணியை செய்தேன். இதில் தொய்வு ஏற்படும் போது தாசில்தார் செய்தி போடுவார் நீங்கள் செய்யவில்லை என்றால் ஆட்சியர் இடம் நேரில் சென்று பதில் சொல்லவேண்டும் என்பார். கல்விப்பணியுடன்  இந்த பணி செய்வது   மிகவும் சிரமம். ஆனால்  ஆசிரியர்களை இப்பணியில் விடுவிக்க முயற்சி செய்ய எவருமில்லை என்கிறார்.*

*🎙கல்வித்துறை அதிகாரிகள் யாரெனினும், மாதம் ஒரு நாள் ஏதேனும் ஒரு பள்ளியின் ஏதேனும் ஒரு வகுப்பின் அனைத்துப் பாடங்களையும்  கற்பித்து பதிவேடுகளில் பதிவு செய்து பார்க்க வேண்டும். அதோடு இந்தப் பணியையும் செய்து பார்த்தால் எங்கள் சிரமம் புரியும்  என்கின்றனர் ஒரு சாரார்.*

*🎙குழந்தைகளிடம் முக்கியமாக ஒன்று, இரண்டு வகுப்பலுள்ளவர்களிடம்.. ஆசிரியர்கள் பெரும்பாலும் சொல்லும் சொற்கள்.. "டேய்.. பேசாதே.. சொன்னதை மட்டும் செய்... "இது தான் ஆசிரியர்களுக்கும் அதிகாரிகளால் பெரும்பாலும் சொல்லப்படுவது.*

*🎙"எதுவும் பேசக்கூடாது.. சொன்னதை செய்ய வேண்டும். "ஆசிரியர்கள் சொல்வதில் ஏதேனும் நியாயமிருக்குமோ என்று சிந்திக்கக் கூட அவர்களுக்கு நேரமிருப்பதில்லை.. என்று ஆசிரியர்கள் வருந்துகின்றனர்.*

*🎙இது 100% வருவாய்த்துறை பணிதான். ஆனால் அவர்கள் இதுபோன்ற பணிகளை முடிந்தவரை ஆசிரியர்களுக்கு மாற்றிக் கொடுத்து மிரட்டுவது வாடிக்கையாகிவிட்டது.*

*🎙பள்ளிக் குழந்தைகளை மனதில் கொள்ளாது எடுக்கும் இம்மாதிரியான முடிவுகளே அரசு பள்ளிகளின் தரம் குறைய காரணம் , இதே போல தனியார் பள்ளிகளிலும் ஆசிரியர்கள் பாடம் எடுப்பதை தவிர்த்து வேறு வேலைகளை செய்வதை அரசு ஏற்றுக்கொள்ளுமா? அல்லது தனியார் பள்ளிகள் தங்கள் ஆசிரியர்களை கற்பித்தல் பணியை விடுத்து இது போன்ற பணிக்கு அமர்த்துகிறதா என்பதையும் அனைவரும் பரிசீலனை செய்ய வேண்டும்.*

*🎙இது போன்ற முடிவுகள் அடித்தட்டு வர்க்க பெற்றோரின்  பிள்ளைகளின் வாழ்க்கையில்  கொஞ்சம் கூட அக்கறை இல்லாமல் காட்டும் மெத்தனப் போக்கு அல்லவா ?*

*🎙வருவாய்த் துறைையின் கீழ் பணியாற்றும் 13 வகையான பணியாளர்களுக்கு இப்பணி வழங்க வேண்டும். ஆனால் செய்வது இல்லை என்பதுடன்  ஆசிரியர்கள் சிலர் வேண்டுமென்று இந்தப்பணியை கேட்டும் வாங்கிக்கொண்டு பார்கின்றார்கள் என்ற கருத்தும் நிலவுகிறது.*

*🎙கிராம நிர்வாக அலுவலரிடம் (VAO) போய் வாக்காளர் பதிவு செய்திருக்க வேண்டும் என்று ஒரே ஒரு ஆணை போட்டாலே கூட போதும் தான். ஆசிரியர்களுக்கு இப்பணிச்சுமை இருக்காது.*

*🎙திருநெல்வேலியில் இப் பணி (BLO) பெரும்பாலும் சத்துணவு அமைப்பாளர்கள் அல்லது அங்கன்வாடி பொறுப்பாளர்களுக்கு வழங்கப்படுகிறது என்றும் கூறுகின்றனர் . கடலூர் மாவட்டத்தில் ஒட்டு மொத்தமாக இப்பணியை ஆசிரியர்கள் புறக்கணித்துவிட்டனர் என்றும் கூறப்படுகிறது.*

*🎙தலைமை ஆசிரியர்கள் இது குறித்து யாரிடமாவது (நம் கல்வித் துறை அதிகாரிகள்,  பேசியதுண்டா ? பேசுவார்களா ? என்றால் அப்படி எவருமே பிரச்சனைகளை அதிகாரிகளிடம் தெரிவிப்பதில்லை என்று அறியப்படுகிறது. மறுபுறம் அவர்கள் அறிந்து தான் மெளனம் காக்கின்றனர் என்கிற குற்றச்சாட்டும்  உண்டு.*

*🎙சரி, இப்பணியை எப்போது செய்ய வேண்டும் என்ற கல்வித்துறை வழி காட்டுதல்கள், உத்தரவு ஏதாவது உண்டா என்றால், பள்ளி நேரங்களில் செய்யலாம் செய்யக்கூடாது என்று உத்தரவெல்லாம் போடமாட்டார்கள் ஆனால் வாய்மொழி உத்தரவு பள்ளி நேரம் தவிர காலை மாலை நேரங்களில் செய்யவும் என்று கூறுவார்கள், என்கின்றனர்.* 

*🎙நமது ஆசிரியர்களுக்கும் குடும்பம் உள்ளதாலும் பெண் ஆசிரியர்கள் இரவு நேரங்களில் கணக்கெடுக்கும் பணியினை மேற்கொள்ள முடியாமலும் பள்ளி நேரங்களில் கணக்கெடுப்பினை முடித்துவிடுகிறார்கள். இப்படியான சூழலில் கற்பித்தல் பணி முற்றிலும் பாதிக்கப்படுகிறது.*

*🎙அப்படி முடிக்கவில்லை என்றால் தாலுக்கா அலுவலகத்திலிருத்து போன் செய்வார்கள் கலெக்டரிடம் சொல்லி மெமோ வழங்க நடவடிக்கை மேற்கொள்வதாக மிரட்டுவார்கள் என்கின்றனர்.*

*🎙ஒரு ஆசிரியருக்கு எத்தனை வாக்காளர்கள் ஒதுக்கப்படுவார்கள்  என்பதற்கு கிடைத்த பதில்.  ஒவ்வொரு BLO விற்கும் குறைந்தது 500 முதல் அதிகபட்சம் 1100 வரை மக்கள் தொகை கொண்டதாக அமைந்துள்ள வாக்காளர்கள்  பட்டியல்  வரும்.  எனில், ஒவ்வொரு நபருக்கும் கணக்கெடுப்பு முடிக்க விபரங்களைப் பதிவு செய்ய ஆகும் நேரம் எவ்வளவு தேவைப்படும் ? விபரங்கள் உடனேயே கிடைத்து விடுமா ? அதுவும் கிடைக்காது. வேலைவாய்ப்பு அலுவலகத்தில்  காத்திருப்போர் இருக்கிறார்கள்  அல்லது தொகுப்பு ஊதியமுறையை அரசு அனைத்து துறைகளிலும் கொண்டுவந்துள்ளது. அதே போல், தேர்தல் ஆணையம் தொகுப்பூதியத்தில் ஆட்களை தேர்வு செய்யலாமே.. கல்லூரியில்  படிக்கும் NSS மாணவர்களை  பயன்படுத்தலாம்.*

*🎙இந்த BLO வேலையைக் கூட நிம்மதியாக பார்த்துவிடலாம். ஆனால் விபரம் தெரியாத பொதுமக்கள் வந்து கேட்கும் கேள்விகளுக்கு பதிலளிக்க தெரியாமல் நாம் அடையும் மன உளைச்சலை சொல்லி முடியாது. என்னுடைய பெயர் வாக்காளர் பட்டியலில் இடம் பெறவில்லை, எத்தனையோ முறை மனு செய்தும் எனது பெயர் இடம் பெறவில்லை. இது கூட பரவாயில்லை ஆனால் என்னுடைய பெயர் வாக்காளர் பட்டியலில் இருந்து நீக்கம் செய்யப்பட்டுள்ளது ஏன் நீங்கள் நிற்கிறீர்கள் ?என்று நம்மை குறிவைத்து கேட்கும் கேள்விகளில் நம்முடைய மன உளைச்சல் அதிகமாகிறது.*

*🎙அதோடு சரியாக வாக்காளர் சரி பார்ப்பு, முகவரி மாற்றம், இறந்தவர் பட்டியல் பெயர் நீக்கம் எல்லாமே ஆசிரியர்கள் தந்தாலும் சரியான பட்டியலை தேர்தல் அன்று தேர்தல் ஆணையம் வெளியிடுவதில்லை. பல்வேறு தவறுகளுடனேயே அப்டேட் செய்யாமல் தான் வெளியிடுகின்றனர் என்றும் ஆசிரியர்கள் சலிப்படைகின்றனர்.*

*🎙ஆசிரியர் சங்கங்கள் இவற்றை நிராகரிக்க வலுவான குரல் எழுப்பி இருக்க வேண்டும் என்பதையும் இங்கு நாம் பதிவு செய்ய வேண்டும். கற்றல் - கற்பித்தல் பாதிக்கப்படும் போது அதை கேள்விக்கு உள்ளாகி இருக்க வேண்டாமா ?*

*🎙உச்சநீதிமன்றம் ஆசிரியர்களை கற்பித்தலுக்கு மட்டுமே பயன்படுத்த வேண்டும் என கூறியுள்ளது.*

*ஆனால் அதனை மனதில் கொள்கிறதா கல்வித் துறை ... இவற்றுக்கெல்லாம் மாற்று என்ன ?*

*ஆசிரியர்களது கற்பித்தல் நேரத்தை இப்படியெல்லாம் பிடுங்கிக் கொண்டால் தரமான கல்வி எங்கிருந்து கிடைக்கும் ?யோசிப்போம்.*

*🎙இத்தகைய முறைகளை மாற்றியமைக்க அரசும் கல்வித்துறையும் முயற்சிகள் மேற்கொள்ள வேண்டும். பொது மக்கள் , பெற்றோர் , சமூக இயக்கங்கள் , மாணவர் அமைப்பு என அனைவருக்கும் இது குறித்த விழிப்புணர்வு வேண்டும். யார் எந்தப் பணியை செய்ய வேண்டும் என்று அனைவரும் புரிதலுடன் விழிப்புணர்வுடன் இருந்தால் தான் தரமான கல்வியை குழந்தைகள் பெறும். ஆசிரியர்களை கற்பித்தல் பணியில் மட்டும் ஈடுபடுத்த வலியுறுத்துவோம்.*

*_(இந்த வாரக் காமதேனு இதழில் வெளியான செய்தி)_*

✒கட்டுரையாளர்;

*_உமா_*
*பள்ளிக் கல்வி பாதுகாப்பு இயக்கம்*

🗝тnρтfαyαn.вℓσgѕρσт.¢σм